هلمند؛ سپين غر الف لوبډلې د مارجې ولسوالۍ د ټېپ بال کرکټ سياليو اتلولي وگټله
د هلمند ولايت د بدني روزنې او سپورټ آمريت اړوند د ټېپ بال کرکټ فدراسيون د استازولۍ له لوري د دې ولايت په مارجې ولسوالۍ کې د اتو لوبډلو ترمنځ د ټېپ بال کرکټ سيالۍ د سپين غر لوبډلې په اتلولۍ پای ته ورسېدې.
په دغو سياليو کې د سپین غر الف، سپین غر ب، پوپل کلب، ستورو، کامران، خوشحال، عرفان افغان او شاهین صداقت لوبډلو گډون کړی وو.
د يادو سياليو پايلوبه د سپين غر الف او عرفان افغان لوبډلو ترمنځ ترسره شوه، چې په پايله کې عرفان افغان لوبډلې په ټاکلو لسو اورونو کې د ټولو لوبغاړو په سوځېدو سره خپلې سيالې لوبډلې ته ۴۷ منډو هدف کېښود، سپين غر الف لوبډلې ياد هدف تر لاسه کړ او د اوو ويکټو په توپير يې بريا خپله کړه.
د دغو سياليو موخه ورزش ته د ځوانانو هڅول وو، چې يوه ورځ يې دوام وکړ او په پای کې گټونکې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
