هلمند؛ سباوون هاشمي لوبډلې د گرشک ولسوالۍ د فوټبال سياليو اتلولي وگټله
د هلمند ولايت د بدني روزنې او ورزش امريت اړوند د فوټبال فدراسيون د استازولي له لوري د گرشک ولسوالۍ په ابو الفتح بُستي لېسه کې د ۱۴ لوبډلو ترمنځ د ابتکار تر نامه لاندې د فوټبال گروپي سيالۍ د سباوون هاشمي لوبډلې په اتلولۍ پای ته ورسېدې.
د يادو سياليو پايلوبه د سباوون هاشمي او شمشاد لوبډلو ترمنځ ترسره شوه، چې په ټاکلي وخت سيالۍ ۳ پر ۳ مساوي پای ته ورسېده، خو په پینالټيانو کې سباوون هاشمي لوبډلې خپلې سيالې لوبډلې ته د ۸ پر ۷ گولونو په توپير ماتې ورکړه او اتلولي يې په خپل نوم کړه.
د يادولو وړ ده، چې د دغو سياليو د ترسره کېدو موخه ورزش ته د ځوانانو هڅول و، چې شاوخوا يوه مياشت يې دوام وکړ.
