هرات؛ په پل پشتون سيمه کې د موټر سايکل ځغلونې ورزشي نندارې ترسره شوې
د هرات ولايت د بدني روزنې او ورزش رياست اړوند د موټرسايکل ځغلونې فدراسيون د استازولۍ له لوري د ياد ولايت په پل پشتون سيمه کې له ۱۰۰ زياتو ورزشکارانو ترمنځ د موټرسايکل ځغلونې نندارې ترسره کړې.
د دغو ورزشي نندارو ليدو ته د المپيک، بدني روزنې او ورزش عمومي رييس مولوي احمدالله وثيق، د ياد رياست مخکينی رييس انجنير نظر محمد مطمئن، د همدې رياست ارشد مشاور ګلاب الدين خپلواک، د موټرسايکل ځغلونې ملي فدراسيون رييس سيد نبي الله سادات، ورسره پلاوي، ورزشکارانو او د ورزش ګڼو مينوالو ګډون کړی و.
دالمپيک، بدني روزنې او ورزش عمومي رييس مولوي احمدالله وثیق د يادو ورزشکارانو ورزشي نندارې وستایلې او دوی ته يې د لا زياتو برياوو هيله څرګنده کړه.
هېره دې نه وي، چې دغه ورزشي نندارې په داسې حال کې ترسره کېږي ، چې په دغه ولايت کې د هيواد په کچه د اي انډ د افغانستان د اس ځغلونې ملي ټاکنيزې سيالۍ هم پيل شوې دي.
