ننگرهار؛ په نازیان ولسوالۍ کې د ۲۰ لوبډلو ترمنځ د شينوارو سوپر ليگ په نوم د ټېپ بال کرکټ سيالۍ پيل شوې
د ننگرهار ولايت د بدني روزنې او سپورټ رياست اړوند د شينوارو شپږگونو ولسواليو ورزشي مديريت له لوري د نازیان ولسوالۍ په چوک لوبغالي کې د ۲۰ لوبډلو ترمنځ د شينوارو سوپر ليگ T10 په نوم د ټېپ بال کرکټ سيالۍ د نازیان زلمو لوبډلې په بريا پيل شوې.
د يادو سياليو لومړنۍ لوبه د نازيان ځلمو او ژۍ سر منگل لوبډلو ترمنځ ترسره شوه، ژۍ سر منگل لوبډلې د لوبې پچې په گټلو سره په ټاکلو لسو اورونو کې سيالې د ۹۳ منډو هدف کېښود، نازيان زلمو لوبډلې ياد هدف په وروستي اور کې ترلاسه کړ او د شپږو ويکټو په توپير يې بريا خپله کړه.
د دغو سياليو د ترسره کېدو موخه له اوسني نظام څخه ملاتړ او د ځوانانو ترمنځ يووالی دی، چې شاوخوا يوه مياشت به دوام وکړي.
