فراه؛ د لویدیځ زون د فوټبال د امتیازي سیالیو لومړی پړاو د هېواد د ورزش ادارې د مشرتابه په شتون کې پای ته ورسېده
په فراه ولایت کې د پنځو ولایتونو په ګډون د فوټبال د غوره لیګ سیالیو ته د لارموندنې په موخه د فوټبال لومړی پړاو امتیازي سیالۍ، چې مالي ملاتړ یې د باران رحمت خیریه بنسټ په غاړه و، د ورزش ادارې د رهبري په حضور کې د فراه ولایت په اتلولۍ پای ته ورسېده.
د دغو لوبو د پای په مراسمو کې د المپیک ملي کمېټې او ورزش عمومي رئیس مولوي احمدالله وثیق، د بدني روزنې او ورزش او د فوټبال فدراسیون فني او مسلکي مرستیال حافظ احمد جان ځدراڼ، د بدني روزنې او ورزش ریاست د دفتر رئیس مولوي فضل الرحمن بري، د افغانستان د فوټبال فدراسیون غړي رؤوف شیر، د باران رحمت خیریه بنسټ بنسټګر عبدالحمید شریفي، د فراه ولایت د بدني روزنې او ورزش آمر حمیدالله حمیدي، د ګډون کوونکو لوبډلو مسؤولینو او د لویدیځ زون ورزشي مسئولانو، لوبغاړو او ګڼ شمېر مینوالو ګډون کړی و.
د بدني روزنې او ورزش عمومي رئیس مولوي احمدالله وثیق د هېواد د ورزش په برخه کې وروستیو لاسته راوړنو او د اسلام له نظره د ورزش اهمیت ته په اشارې وویل: «موږ هڅه کوو چې له مرکز څخه ولایتونو، له ولایتونو څخه ولسوالیو، له ولسوالیو څخه کلیو او بانډو او د هېواد په هر کونج او لرې پرتو سیمو کې ورزش ته پراختیا او وده ورکړو.»
نوموړي همداراز په هېواد کې د بشپړ اسلامي نظام او امنیت شتون په هېواد کې د ورزش د ودې لپاره یو کمساری فرصت وباله او زیاته یې کړه چې له دې فرصت څخه باید پوره ګټه واخلو.
دغه سیالۍ د فراه عدالت سنګ روز، د نیمروز ابو مسلم، د هرات صرافان، د بادغیس اتحاد او د غور اتفاق آرش لوبډلو په ګډون د افغانستان د فوټبال غوره لیګ سیالیو کې د ګډون په موخه فراه ولایت په مرکزي لوبغالي کې ترسره شوې.
دغه سیالۍ چې له پنځو ورځو راهیسې یې دوام درلود، په پایلوبه کې یې د نیمروز ابو مسلم او هرات صرافانو لوبډلې له یو بل سره مخ شوې چې، د نیمروز ابو مسلم لوبډله د ۲-۱ ګولو په توپیر بریالۍ شوه او د فراه ولایت عدالت سنګ روز لوبډله د ۱۰ نمرو په ترلاسه کولو سره د دغو سیالیو اتله لوبډله اعلان شوه.
په ورته وخت کې د فراه ولایت د عدالت سنګ روز لوبډلې څخه شاه محمد عظیمي غوره لوبڅار، د هرات صرافان لوبډلې څخه طارق محمدي غوره لوبغاړی، د هرات صرافان لوبډلې څخه خالد بارکزی او د بادغیس لوبډلې څخه فاروق شاه یوسفي غوره ګول وهونکي او د نیمروز ابو مسلم لوبډلې څخه عزت الله چاکرزی غوره ګول ساتونکی اعلان شو.
دا په داسې حال کې ده چې له پنځو ورځو راهیسې د زونونو په کچه د فوټبال سیالۍ د هېواد په پنځو زونونو (لویدیځ زون فراه، شمال ختیځ زون کندز، شمال زون فاریاب، سوېل ختیځ زون ننګرهار او سوېل لویدیځ زون کندهار) کې د ۲۶ ولایتونو په ګډون پیل او نن یې پایلوبې ترسره شوې.
همداراز ټاکل شوې، چې د مرکز زون سیالۍ به ډېر ژر په پلازمېنه کابل کې ترسره شي.
