غزني؛ ګیرو ولسوالۍ کې د ۱۸ لوبډلو ترمنځ د ټېپ بال کرېکټ سیالۍ د سلیمان زلمو لوبډلې په اتلولي پای ته ورسېدې
د غزني ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د یاد ولایت په ګیرو ولسوالۍ کې ۱۸ لوبډلو ترمنځ د ټېپ بال کرېکټ اختریزې سیالۍ د سلیمان زلمو لوبډلې په اتلولي پای ته ورسېدې.
د یادو سیالیو پای لوبه د سلیمان زلمو او مرکز پني لوبډلو ترمنځ ترسره شوه، چې سلیمان زلمو لوبډلې د لوبې د پچې په ګټلو سره لومړی توپ وهنه وکړه او په ټاکلو ٢٠ اورونو کې یې خپلې سیالې لوبډلې ته د ۱۱۰ منډو هدف وټاکه. مرکز پني لوبډلې د یاد هدف په تعقیب کې یوازې ١٠٠ منډې وکړې او سیالي د سلیمان زلمو لوبډلې د ۱۰ منډو په توپیر وګتله او اتلولي یې په خپل نوم کړه.
یادې سیالۍ د لوی اختر د لمانځلو په مناسبت پیل شوې وې، چې دوې اوونۍ یې دوام وکړ او په پای کې اتلې لوبډلې ته د اتلولي کپ او غوره لوبغاړو ته مډالونه او ستاینلیکونه ورکړل شول.
