غزني؛ جاغوري ولسوالۍ کې د والیبال سیالۍ د هدایت لېسې لوبډلې په اتلولۍ پای ته ورسېدې
د غزني ولایت د بدني روزنې او ورزش امریت اړوند د والیبال ملي فدراسیون د استازولۍ له لوري د یاد ولایت په جاغوري ولسوالۍ کې د ۲۸ لوبډلو ترمنځ د معارف جام په نوم د والیبال سیالۍ، چې یوه میاشت وړاندې پیل شوې وې د هدایت لېسې لوبډلې په اتلولۍ پای ته ورسېدې.
د دغو سیالیو په پایلوبه کې د هدایت لېسې لوبډلې خپلې سیالې فیضیه لېسې لوبډلې ته د ۳/۲ میدانونو په توپیر ماتې ورکړه او اتلولي یې خپله کړه.
د یادو سیالیو موخه د والیبال ورزش ته وده ورکول او د زده کوونکو ترمنځ یووالی رامنځته کول و.
د سیالیو په پای کې د ورزش مسوولینو له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
