زابل؛ قلات کې د ۱۲۰ پهلوانانو ترمنځ د غیږنیونې سیالۍ ترسره شوې
د زابل مرکز، میزانې او ارغستان ولسوالیو او د کندهار د ۱۲۰پهلوانانو ترمنځ د غېږنیونې سیالۍ، چې د جمعې په ورځ پیل شوې وې د زابل میزانې ولسوالۍ په لومړي مقام پای ته ورسېدې.
دا سیالۍ د زابل د بدني روزنې او سپورټ امریت په مالي ملاتړ د غېږنیونې فدراسیون له خوا د مرکز قلات، میزانې او ارغستان ولسوالیو او د کندهار ولایت د ۱۲۰پهلوانانو ترمنځ د شیخ متي لېسې په سټوډیم کې د دوه ورځو لپاره ترسره شوې.
یادې سیالۍ چې په لومړي ځل قلات کې ترسره شوې، د زابل د بدني روزنې او ورزش امریت مسوولینو ترڅنګ، مخورو، ځوانانو، ورزشکارانو او ګڼو مینوالو پکې ګډون کړی وو.
د دې سیالیو موخه د دودیزو لوبو وده، له مخدره توکو سره مبارزه او ورزش ته د ځوانانو هڅول و.
د پای په مراسمو کې لومړي مقام لوبډلې ته کپ او غوره لوبغاړو ته مډالونونه او نورې ډالۍ ورکړل شوې.
