د فوټسال ملي لوبډلې له روزونکي مجيد مرتضايي سره د روزنې یو کلن قرارداد تمدید شو
د المپيک، بدني روزنې او ورزش عمومي رياست اړوند د فوټبال ملي فدراسيون، د يو بل کال لپاره مجيد مرتضايي د فوټسال ملي لوبډلې د مشر روزونکي په توګه وټاکه.
له مجيد مرتضايي سره د تړون د غځولو په مراسمو کې د فوټبال فدراسیون رئيس محمد يوسف کارګر، د ياد فدراسیون مرستيال حافظ احمد جان ځدراڼ او د فوټسال ملي کمېټې تخنيکي مرستيال فريد احمد يوسفزی او د رسنيو استازو ګډون کړی وو.
په دغه مراسمو کې د فوټبال فدراسیون رئيس محمد يوسف کارګر، د فوټسال ملي لوبډلې وروستۍ لاسته راوړنې د مجيد مرتضايي د غوره روزنې پايله ياده کړه او زیاته يې کړه، چې افغانستان فوټسال ملي لوبډله په ۲۰۲۴ کال کې له بل هر وخت ښه وځلیده.
بل لور ته مجيد مرتضايي د افغانستان فوټبال فدراسیون له يو ځل بیا باور کولو څخه خوښې وښوده او زیاته يې کړه، چې زه به تر وروستي حده کوښښ کوم، چې د فوټسال ملي لوبډلې اوسنی موقف وساتم او لا پرمختګ ورکړم.
مجيد مرتضايي له ايران هېواد څخه دی، چې له ۲۰۲۲ ميلادي کال راهيسې د فوټسال ملي لوبډلې د مشر روزونکي په توګه دنده ترسره کوي.
د يادونې وړ ده، چې د مجيد مرتضايي تر روزنې لاندي د فوټسال ملي لوبډلې په لومړي ځل د فوټسال نړيوال جام سياليو ته لار ومونده او هم يې د مرکزي اسيا فوټسال سياليو کې دويم مقام ترلاسه کړ.a
