د المپيک ملي کمېټې او سپورټ عمومي رييس د سنوکر فدراسيون له استازو سره وکتل
د المپيک ملي کمېټې او سپورټ عمومي رييس الحاج مولوي عبدالودو حقاني د سنوکر فدراسيون له استازو سره وکتل او په يولړ موضوعاتو يې خبرې وکړې.
دا په داسې حال کې ده چې د سنوکر ملي فدراسيون لوبغاړو په اسيايي سياليو کې، چې په ايران هيواد کې ترسره شوې ګډون کړی و او په پايله کې يې درې د برنزو مډالونه او سندونه ترلاسه کړل.
په دغو سياليو کې د ۱۳ اسيايي هيوادونو ورزشکارانو ګډون کړی و چې په فول فريم ټيمي برخه کې افغان ورزشکارانو د برنزو د دريو مډالونو د ترلاسه کولو ترڅنګ د هيوادونو ترمنځ درېيم مقام هم ترلاسه کړ.
په دغه ناسته کې د سنوکر په برخه کې په شته ستونزو او حل لارو خبرې وشوې او همداراز د بدني روزنې او ورزش عمومي رييس الحاج مولوي عبدالودود حقاني له ايران هيواد څخه مډال راوړنکي ورزشکاران وستايل.
د دې ترڅنک د المپيک ملي کمېټې او سپورټ عمومي رييس الحاج مولوي عبدالودود حقاني د ياد فدراسيون مسولينو ته د ملاتړ ډاډ ورکړ او زياته يې کړه چې موږ نه يوازې له سنوکر؛ بلکي له ټولو فدراسيونونو او د هرې څانګې له ورزشکارانو سره همکاري کوو.
