خوست کې د ۲۵ ښوونځیو ترمنځ د ټېپ بال کرکټ سیالي پیل شوې
د خوست ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د یاد ولایت مرکز اړوند غرغښت لېسه کې د ۲۵ خصوصي او دولتي ښوونځیو ترمنځ د معارف جام په نوم د ټېپ بال کرکټ دویم پړاو سیالۍ پیل شوې.
د یادو سیالیو لومړۍ لوبه د غرغښت او غازي امان الله خان لېسو لوبډلو ترمنځ ترسره شوه. د لوبې پچه غرغښت لېسې لوبډلې وګټله او په ټاکلو لسو اورونو کې یې د خپلو دوو لوبغاړو په له لاسه ورکولو سره خپلې سیالې لوبډلې ته د ۱۶۴ منډو هدف وټاکه. د غازي امان الله خان لېسې لوبډلې د هدف په تعقیب کې د خپلو ټولو لوبغاړو په له لاسه ورکولو سره یوازې ۶۴ منډې وکړې او لوبه یې د ۹۹ منډو په توپیر وبایلله.
یادې سیالۍ د لیګ په ډول ترسره کېږي، چې یوه نیمه میاشت به دوام وکړي.
