خوست؛ ځاځي ميدان ولسوالۍ کې د ۴۰ لوبډلو ترمنځ د ټېپ بال کرکټ سيالۍ پای ته ورسېدې
د خوست ولایت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري په ځاځي میدان ولسوالۍ کې د ۴۰ لوبډلو ترمنځ د ټېپ بال کرکټ ټاکنيزې سيالۍ د رشيد لوبډلې په اتلولۍ پای ته ورسېدې.
د يادو سياليو پايلوبه د رشيد او عثمان لوبډلو ترمنځ ترسره شوه، چې په پايله کې عثمان لوبډلې په اتو اورونو کې د اتو لوبغاړو په سوځېدو سره خپلې سيالې لوبډلې ته د ۶۲ منډو هدف کېښود، رشيد لوبډلې ياد هدف په اووم اور کې ترلاسه کړ او د څلور ويکټو په توپير يې بريا خپله کړه.
د دغو سياليو موخه د غوره لوبغاړو موندل وو، چې شاوخوا يوه نيمه مياشت يې دوام وکړ او په پای کې د ياد ولايت د ورزش امريت له لوري لومړي او دويم مقام گټونکو لوبډلو ته کپونه او غوره لوبغاړو ته مډالونه ورکړل شول.
