خوست؛ مرکز کې د ۲۰ لوبډلو ترمنځ د فوټبال سیالۍ پای ته ورسېدې
د خوست ولایت د بدني روزنې او ورزش آمریت اړوند د فوټبال فدراسیون د استازولي له لوري د یاد ولایت مرکز کونډیو سیمه کې د ۲۰ لوبډلو ترمنځ د فوټبال سیالۍ د میچن بابا کلپ لوبډلې په اتلولي پای ته ورسېدې.
د یادو سیالیو پایلوبه د میچن بابا کلپ او منګسو متحد لوبډلو ترمنځ ترسره شوه، چې په پایله کې یې د میچن بابا کلپ لوبډلې د ۳ پر صفر میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
د سیالیو د پای په مراسمو کې اتلې لوبډلې ته د اتلولي کپ او غوره لوبغاړو ته مډالونه او نورې ډالۍ ورکړل شوې.
