خوست؛ خالبساط لوبډلې د ټېب بال کرکټ سياليو اتلولي وگټله
د خوست ولايت د بدني روزنې او سپورټ آمريت اړوند، د ټېب بال کرکټ فدراسيون د استازولۍ لۀ لورې، د ياد ولايت په صبريو ولسوالۍ کې د ۶۲ لوبډلو تر منځ د ټېب بال کرکټ انتخابي سيالۍ د خالبساط لوبډلې په اتلولۍ پای ته ورسېدې.
د يادو سياليو پايلوبه د يعقوبيو او خالبساط لوبډلو تر منځ تر سره شوه، د لوبې پچه خالبساط لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د اتو لوبغاړو په سوځېدو سره سیالې لوبډلې ته د ۱۰۶ منډو هدف کېښود، يعقوبيو لوبډله د ياد هدف په پوره کېدو کې پاتې راغله او د ۲۷ منډو په توپير خالبساط لوبډلې د يادو سياليو اتلولي په خپل نوم کړه.
دغه سيالۍ، چې دوې مياشتې يې دوام کړ، موخه يې د يادې ولسوالۍ منتخبې لوبډلې ته د غوره لوبغاړو پېدا کول و. پۀ پای کې لومړي او دويم مقام گټونکو لوبډلو ته کپونه او غوره لوبغاړو ته ډالۍ ورکړل شوې.
