بلخ ياران عمر لوبډلې د شمال زون فوټسال سیالیو اتلولي وگټله
د المپيک، بدني روزنې او ورزش عمومي رياست اړوند د فوټبال ملي فدراسيون له لوري او د بلخ ولايت د بدني روزنې او ورزش رياست په همغږۍ د ياد ولايت په مرکز امام خميني جمنازيوم کې د پنځو ولايتونو ترمنځ د شمال زون فوټسال سيالۍ، چې پنځه ورځې مخکې پيل شوې وې د بلخ ياران عمر لوبډلې په اتلولۍ پای ته ورسېدې.
په يادو سياليو کې د بلخ ياران عمر، جوزجان نظري کلب، فارياب اميد جاويدان، سرپل او سمنگان لوبډلو گډون کړی وو، چې په پايله کې بلخ ياران عمر لوبډلې بې له کومې ماتې د ۱۲ امتيازونو په ترلاسه کولو سره لومړی، جوزجان نظري کلب لوبډلې دويم او فارياب اميد جاويدان لوبډلې بيا درېيم مقام خپل کړ.
د ويلو وړ ده، چې يادې سيالۍ د افغانستان زونونو په کچه د فوټسال دويم پړاو غوره ليگ سياليو ته د لار موندنې په موخه ترسره شوې، چې په پای کې د بلخ ولايت څخه ياران عمر لوبډلې لار پېدا کړه.
