بغلان ؛ پلخمري ښار کې د اتو لوبډلو ترمنځ د والیبال لومړی پړاو سیالۍ ترسره شوې
د بغلان ولایت د بدني روزنې او ورزش امریت اړوند د والیبال فدراسیون د استازولۍ له لوري د پلخمري ښار په والیبال جمنازیوم کې د یاد ښار د مکتبونو اتو لوبډلو ترمنځ د والیبال لومړی پړاو سیالۍ د عمر فاروق لېسې لوبډلې په اتلولۍ پای ته ورسېدې.
د دغو سیالیو په پایلوبه کې د عمرفاروق لېسې لوبډلې خپلې سیالې ابراهیم خان ګاو سوار لېسې لوبډلې ته د ۳/۲ میدانونو په توپير ماتې ورکړه او اتلولي یې خپله کړه.
د یادو سیالیو موخه د والیبال ورزش ته وده ورکول او د زده کوونکو ته یوه سالمه تفریح برابرول و.
د سیالیو په پای کې د بغلان ورزشي امریت له لوري غوره لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
