امنيه قومنداني لوبډلې د فارياب ولايت د فوټسال سياليو اتلولي وگټله
د فارياب ولايت د بدني روزنې او ورزش آمريت اړوند د فوټبال فدراسيون د استازولۍ له لوري د ياد ولايت په ميمنې ښار کې د بېلابېلو ادارو څخه د ۱۶ لوبډلو ترمنځ د فوټسال سيالۍ، چې ۲۵ ورځې مخکې پيل شوې وې، د امنیه قومنداني لوبډلې په اتلولۍ پای ته ورسېدې.
د يادو سياليو په پايلوبه کې امينه قومنداني لوبډلې خپلې سيالې معارف رياست لوبډلې ته د ۶/۸ گولونو په توپير ماتې ورکړه او اتلولي يې خپله کړه.
همدارنگه د دغو سياليو غوره لوبغاړی محمد نعيم صياد، غوره گول وهونکی عصمت الله محمدي او غوره گول ساتونکی بيا مصباح الله ميهن ونومول شول.
ياده دې وي، چې د دغو سياليو په پای کې اتلې لوبډلې ته د اتلولۍ جام او غوره لوبغاړو ته مډالونه او ستاينليکونه ورکړل شول.
