پکتیکا؛ یوسف خېلو ولسوالۍ کې د ٢٩ لوبډلو ترمنځ نیزه وهنې سیالۍ ترسره شوې
د پکتیکا ولایت د بدني روزنې او ورزش امریت اړوند د نیزه وهنې فدراسیون د استازولي له لوري د ياد ولايت په یوسف خېلو ولسوالۍ کې د څلورو ولایتونو د ۲۹ لوبډلو ترمنځ د نیزه وهنې سیالۍ د پکتیکا مرکز شرنې اتفاق لوبډلې په اتلولي پای ته ورسېدې.
په یادو سیالیو کې اتفاق لوبډلي په ۳۶ نمرو سره لومړی، ګټواز کلب لوبډلې په ۳۲ نمرو سره دویم او خوست لوبډلې په ۲۸ نمرو سره درېیم مقام تر لاسه کړ.
دغه سيالۍ د نیزه وهنې لوبې ته د ودې ورکولو په موخه ترسره شوې، چې یوه ورځ یې دوام وکړ او په پای کې اتلې لوبډلې ته یو پسه، دویم مقام ګټونکې ته یو سېرلی او نورو لوبډلو ته چمتو شوې ډالۍ ورکړل شوې.
