پروان ولايت کې د ازادۍ فوټسال جام سيالۍ د جبل السراج پيشتازان لوبډلې په اتلولۍ پای ته ورسېدې
د پروان ولايت د بدني روزنې او ورزش امريت اړوند د فوټبال ملي فدراسيون د استازولۍ له لوري د ياد ولايت په جبل السراج ولسوالۍ کې د ازادۍ فوټسال جام په نوم، د پروان ولايت د ولسواليو او د کابل قره باغ ولسوالۍ لوبډلې په ګډون د اوو لوبډلو ترمنځ د فوټسال سيالۍ د جبل السراج پيشتازان لوبډلې په اتلولۍ پای ته ورسېدې.
د دغو سياليو په پايلوبه کې جبل السراج پيشتازان F.C لوبډلې خپلې سيالې صلح پروان لوبډلې ته د ۶/۱ ګولونو په توپير ماتې ورکړه او اتلولي يې خپله کړه.
د يادو سياليو موخه د فوټسال لوبو ته وده ورکول، د غوره استعدادونو موندل او ورزش ته د ځوانانو هڅول و، د سياليو په پای کې غوره لوبډلو ته کپونه، مډالونه او د اتلولۍ حکمونه ورکړل شول.
