د ورزش ادارې رهبري د المپیکي فدراسيونونو له رئیسانو سره جلسه وکړه
د المپیک، بدني روزنې او ورزش عمومي ریاست رییس مولوي احمدالله وثیق نن د المپیکي فدراسیونونو له رئیسانو سره په دې موخه جلسه وکړه، چې په دوو نړیوالو ورزشي برنامو کې د ګډون لپاره په کوم معیار ملي لوبغاړي د ګران هېواد په استازولۍ د دغو نړیوالو سیالیو لپاره غوره شي.
په دغه جلسه کې پر عمومي رئیس سربېره، د دغه ریاست فني او مسلکي معاون حافظ احمد جان ځدراڼ، د المپیکي چارو رئیس داد محمد پاينده اختري، د المپیک ملي کمېټې معاون باور هوتک، د ورزش ادارې د دفتر رئیس مولوي فضل الرحمن بري، د المپیکي فدراسیونونو رئیسانو ګډون کړی و.
د دغې جلسې په پيل کې مولوي احمدالله وثیق وویل:« د خوشحالي ځای دی، چې د ورزش د ترقي او بهبود لپاره راټول شوي يوو. » نوموړی زیاته کړه؛ ښه په جرأت ووايئ، چې څنګه کولی شو؛ ترڅو په نړيوالو ډګرونو کې د هیواد او ادارې نوم وساتو، درېدلي فدراسيونونو په حرکت را شي او فعال فدراسيونونو اتلولۍ راوړۍ، تاسو ته د ملت سترګې دي، موږ تاسو سره همکار یو او حمایت مو کوو او ستاسو په فني غواروي کې هیڅوک مداخله نه شي کولی.
همدارنګه ښاغلي وثیق زياته کړه ،چې الحمدلله تر بل هر وخت هیواد امن دی او د مختلفو هیوادونه لوبغاړي او سیلانیان دلته د لوبو لپاره راځي.
په دغو برنامو کې آسیایي المپیکي سیالۍ د نويو ځوانانو په کټګورۍ کې د بحرین هیواد په کوربتوب او د اسلامي هیوادونو سیالۍ د سعودي عربستان په کوربتوب د ۲۰۲۵ په اکتوبر او نومبر کې ترسره کیږي. چې د ۲۶ فدراسیونونو ګڼ شمیر ملي لوبغاړي او ټیمونه به له افغانستان څخه پکې ګډون وکړي.
په پای کې د فدراسیونونو د رئیسانو له لوري وړاندې شوي نظرونه د رهبري پلاوۍ له لوري په واوريدل شول او جلسه د خیر په دعا پای ته ورسېده.
