میدان وردګ؛ سیدآباد ولسوالۍ کې د ٢٥ لوبډلو ترمنځ د ټېپ بال کرکټ سیالۍ پای ته ورسېدې
د میدان وردګ ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د یاد ولایت د سید آباد ولسوالۍ په تره خېلو کلي کې د ٢٥ لوبډلو ترمنځ د ټېپ بال کرکټ سیالۍ د نیلاب کاروان لوبډلې په اتلولي پای ته ورسېدې.
د یادو سیالیو پایلوبه د نیلاب کاروان او تره خېلو ځوانانو لوبډلو ترمنځ ترسره شوه، چې نېلاب کاروان لوبډلې په ټاکلو اتو اورونو کې د درېیو لوبغاړو په له لاسه ورکولو سره خپلې سیالې لوبډلې ته د ١١٢ منډو هدف وټاکه. تره خېلو ځوانانو لوبډلې د هدف په تعقیب کې یوازې ٧٧ منډې وکړې او سیالۍ یې د ٣٤ منډو په توپیر وبایلله.
دغه سیالۍ په سیمه کې ورزش ته د ودې او د ځوانانو ترمنځ د یووالي د رامنځته کېدو په موخه ترسره شوې چې په پایله کې لومړي، دویم او درېیم مقام لوبډلو ته کپونه او نورې ډالۍ ورکړل شوې.
