د هېواد پنځو زونو کې په يو وخت د فوټبال اتلولۍ سيالۍ پيل شوې
د فوټبال ملي فدراسیون د زونونو اتلوليو دوه يم پړاو ليګ نن سه شنبه د هېواد په څلور زونو کې پيلوي.
د هېواد فوټبال فدراسیون سرچينې د معلوماتو په اساس د دې سياليو پچې اچونې مراسم تېره شپه د شاملو لوبډلو په ګډون په کوربه ولايتونو کې د فوټبال فدراسیون استازي او د ولايتي څانګو مسوولینو په شتون کې ترسره شول.
دغه سيالۍ په جنوب شرق زون کې د خوست، ننګرهار، لغمان، پکتیا او ميدان وردګو ولايتونو په ګډون د خوست په کوربتوب ترسره کيږي.
په شمال زون کې د بلخ په کوربتوب د سمنګان، سرپل، جوزجان او فارياب ولايتونو فوټبال لوبډلې شاملې دي.
همداراز په شمال شرق زون کې بيا د بغلان، باميان، بدخشان، او کوربه کندز ولايتونو لوبډلې ګډون لري.
دغه راز د زابل، ارزګان، غزني، کندهار لوبډلې د سياليو ترسره کېدو لپاره هلمند ته ځي ترڅو هلته خپلې سيالۍ وکړي.
هرات ولايت به د هېواد غرب زون اتلولۍ سيالۍ د فراه، غور، بادغيس او نيمروز لوبډلو په ګډون سره د دې ولايت په کوربتوب ترسره کړي.
ټاکل شوې دغه سيالۍ به لس ورځې دوام وکړي د فوټبال فدراسیون د دې سياليو ترسره کېدو موخه د افغانستان اتلوليو سياليو ليګ ته چمتووالى ښيي چې د دې سياليو جريان څخه د څارنې په منظور فني او مسلکي پلاوي يادو زونو ته استول شوي دي.
دغه سيالۍ به په يو وخت نن سه شنبه د زمري په ٤نېټه د بلخ، خوست، هلمند، کندز او هرات ولايتونو په ورزشي سټډيمونو کې پيل شي.
