خوست؛ گربزو ولسوالۍ کې د اتو لوبډلو ترمنځ د ټېپ بال کرېکټ سيالۍ پای ته ورسېدې
د خوست ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري او د انجينر غني محمد په مالي ملاتړ د گربزو ولسوالۍ په شيخ امير تندر ورزشي لوبغالي کې د اتو لوبډلو ترمنځ د ټېپ بال کرېکټ سيالۍ د تندر لوبډلې په اتلولۍ پای ته ورسېدې.
د دغو سياليو پايلوبه د تندر او گربز سټار کلب لوبډلو ترمنځ ترسره شوه. د لوبې پچه گربز سټار کلب لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د اوو لوبغاړو په سوځېدو سره سيالې لوبډلې ته د ۱۲۴ منډو هدف وټاکه، په مقابل کې تندر لوبډلې ياد هدف د لوبې په اتم ارو کې ترلاسه کړ او د اوو ویکټو په توپير يې بريا خپله کړه.
د يادونې وړ ده، چې دغه سيالۍ په گروپي شکل ترسره شوې او شاوخوا يوه مياشت يې دوام وکړ.
