کابل؛ د زور خانه يي ورزشونو ملي فدراسيون ديارلس کسيزه ملي لوبډله ايران هېواد ته روانه شوه
د المپيک، بدني روزنې او ورزش عمومي رياست اړوند د زور خانه يي ورزشونو ملي فدراسيون ۱۳ کسيزه ملي لوبډله ( ۱۱ لوبغاړي او يو ۲ کسیز پلاوی) د زور خانه يي ورزشونو او د پهلوانۍ غېږنيونې د اسیا اتلولۍ سياليو اووم پړاو کې د ګډون په موخه ايران هېواد ته روانه شوه.
په دغه سياليو کې به د افغانستان په استازولۍ ۱۱ ورزشکاران له ۵۰ تر مثبت ۹۰ کيلو وزني کټګورۍ په دوه جلا برخو ټيمي او انفرادي کې د خپلو سيالانو پر وړاندې د سيالۍ ډګر ته ښکته شي.
د يادې لوبډلې د مخې ښې په مراسمو کې د هېواد د ورزش ادارې عمومي رياست عمومي رييس مولوي احمدالله وثيق ، د دې ادارې فني او مسلکي مرستيال حافظ احمد جان ځدراڼ او د نشراتو رئيس اتل مشواڼي ګډون کړی وو، چې ښاغلي احمدالله وثيق لوبغاړو ته په دغه سياليو کې د برياليتوب د دعا ترڅنګ د ډک لاس راستنيدو هيله وښوده.
د ۲۰۲۵ د زور خانه يي ورزشونو او پهلوانۍ غېږنيونې د اسيا اتلولۍ سياليو اووم پړاو لومړی پړاو به د افغانستان په ګډون د ۲۰ څخه زياتو هېوادونو ترمنځ د روان کال د اکتوبر میاشتې پر ۸مه نېټه د ايران هېواد په کوربتوب د دې هېواد په اروميه ښار کې پيل شي، چې د همدې میاشتې تر ۱۱مې نيټې به دوام وکړي.
