ننګرهار؛ په شينوارو ولسوالۍ کې د ۱۶ لوبډلو ترمنځ د ټېپ بال کرکټ سیالۍ پیل شوې
د ننګرهار ولایت د بدني روزنې او ورزش رياست اړوند د ټېپ بال کرکټ فدراسيون د استازولۍ له لوري د ياد ولايت په شينوارو ولسوالۍ کې د ۱۶ لوبډلو ترمنځ د ټېپ بال کرکټ سيالۍ پيل شوې.
د يادو سياليو لومړۍ لوبه د شينواري سټار اوګلاهي ارباپانو لوبډلو ترمنځ ترسره شوه، شينواري سټار لوبډلې د پچې په ګټلو سره د توپ وهنې پرېکړه وکړه، چې په ټاکلو اتو اورونو کې د اووه لوبغاړو په سوځېدو سره مقابلې لوبډلې ته د ۱۱۴ منډو هدف وټاکه. په ځواب کې د ګلاهي ارباپانو لوبډلې د ټولو لوبغاړو په سوځېدو سره ۷۸ منډې جوړې کړې او د ۳۵ منډو په توپير سره يي لوبه وبایلله.
د يادو سياليو موخه له نظام څخه ملاتړ او يووالی دي، چې ۱۵ ورځې به دوام وکړي.
