د المپیک ملي کمېټې په انګړ کې د قران عظيم شان ختم او د روژه ماتي مراسم ترسره شول
د المپيک ملي کمېټې په انګړ کې د روژې مبارکې میاشتې په مناسبت د قران عظیم شان ختم او د روژه ماتي مراسم ترسره شول. په دغو مراسمو کې د المپیک، بدني روزنې او ورزش عمومي رئیس مولوي احمد الله وثیق، د یاد ریاست رهبري غړیو ، د فدراسیونونو رئیسانو او ورزشکارانو ګډون کړی و.
دغه مراسم د قران عظيم شان په ختمانه پيل او ورپسې مولوي احمدالله وثيق خبرې وکړې هغه وویل: " خوښ يم، چې يو ځل بيا د مغفرت مياشتې په دې مبارکو ورځو کې له تاسو سره د قران عظيم شان په مبارک ختم کې ګډون کوم."
ده يو ځل بيا سږ کال د ورزش په برخه کې له لاسته راوړنو ډک کال وباله او د ټولو لاسته راوړونو مبارکي يې د افغانستان قدرمن ملت ته په ځانګړي ډول ورزشکارانو ته وړاندې کړه.
ښاغلي وثيق د دغو لاسته راوړنو تر شا د ورزشي فدراسيونونو د مسولينو او ورزشکارانو هڅې وبللې او په راتلونکې کې يې ورته د لا زياتو برياوو غوښتنه وکړه.
د يادونې وړ ده، چې د يادو مراسمو په پای کې ګډونوالو ته د روژه ماتي ترتیب هم شوی و او ټولو ګډونوالو په ګډه سره روژه ماته کړه.
