خوست؛ په سپېرې ولسوالۍ کې د ۱۷ لوبډلو ترمنځ د ټیپ بال کرېکټ سيالۍ پای ته ورسېدې
د خوست ولايت د بدني روزنې او ورزش امريت په همکارۍ د ياد ولايت په سپېرې ولسوالۍ کې د ۱۷ لوبډلو ترمنځ د ټیپ بال کرېکټ سيالۍ، چې پنځه ورځې مخکې پيل شوې وې د هېواد لوبډلې په اتلولۍ پای ته ورسېدې.
د يادو سياليو پايلوبه د هېواد او سميع لوبډلو ترمنځ ترسره شوه، د لوبې پچه سميع لوبډلې وگټله او لومړی يې د توپ وهنې پرېکړه وکړه، چې د وخت د کمښت له امله په ټاکلو پنځو اورونو کې د څلورو لوبغاړو په سوځېدو سره سیالې لوبډلې ته د ۴۷ منډو هدف وټاکه، په مقابل کې هېواد لوبډلې ياد هدف په څلورم اور کې ترلاسه کړ او لوبه يې د اتو ويکټو په توپير وگټله.
د يادونې وړ ده، چې د دغو سياليو په پای کې لومړي او دويم مقام گټونکو لوبډلو ته کپونه، مډالونه او غوره لوبغاړو ته چمتو شوې ډالۍ ورکړل شوې.
