کابل کې د ۱۴ لوبډلو ترمنځ د بسکټبال ملي لوبډلې پنځه څلوېښتم پړاو ټاکنیزې سیالۍ پيل شوې
د المپیک، بدني روزنې او ورزش عمومي ریاست اړوند د بسکټبال ملي فدراسیون د استازولۍ له لوري د یاد ریاست په ۵۰۰ کسیز جمنازیوم کې له ۱۳ ولایتونو د ۱۴ لوبډلو ترمنځ د بسکټبال ملي لوبډلې پنځه څلوېښتم پړاو ټاکنیزې سیالۍ پيل شوې.
دغه سیالۍ به د بسکټبال ازاد کټګورۍ کې د ورزشکارانو ترمنځ ترسره شي، چې په پایله کې ۱۸ ورزشکاران د لویو ورزشکارانو ملي لوبډلې ته، ۱۴ ورزشکاران د ځوانانو ملي لوبډلې ته او ۱۲ ورزشکاران به د نویو ځوانانو بسکټبال ملي لوبډلې ته وټاکل شي.
د دغو سیالیو په لومړي لوبه کې د ننګرهار ولایت لوبډلې خپلې سیالې د بلخ ولایت لوبډلې ته د ۵۱/۳۵ نومرو په توپير ماتې ورکړه او لومړي بریا یې خپله کړه.
د دغو سیالیو پرانیستغونډې ته د المپیک کمېټې، بدني روزنې اوورزش عمومي ریاست فني او مسلکي مرستیال حافظ احمد جان ځدراڼ، د کابل ښار بدني روزنې او ورزش ریاست ریئس مولوي عتیق الله خالد، د ورزش ادارې د امریتونو مسوولین، د بسکټبال ملي فدراسیون رهبري پلاوي، د ولایتونو استازي، ورزشکاران او زیات شمېر مینوال راغلي وو.
د یادو سیالیو موخه د هېواد د بسکټبال ملي لوبډلې ته د غوره لوبغاړو موندل دي، چې یوه اوونۍ به دوام کړي.
