باختر پوهنتون له چین هیواد څخه د دوو مډالونو ګټونکی سمیر رحماني وستایه
باختر خصوصي پوهنتون او ښوونځي د ورزش ادارې د معاونیت په شتون کې له چین هیواد څخه د ITF تکواندو په برخه کې دوو د سرو زرو مډالونو ګټونکی سمیر رحماني د یوې ځانګړې غونډې په ترڅ کې وستایه او د وروستۍ لاسته راوړنې تقدیر یې وکړ.
په دې مراسمو کې د بدني روزنې او ورزش عمومي ریاست فني او مسلکي مرستیال حافظ احمد جان ځدراڼ، د المپیک، بدني روزنې او سپورټ عمومي ریاست د نشراتو رئیس او ویاند اتل مشواڼي، د باختر پوهنتون او ښوونځي رهبري غړو، د ITF ملي فدراسیون رئیس محمد شعیب رحماني او زده کوونکو ګډون کړی و.
مراسمو ته حافظ احمد جان ځدراڼ وویل: لله الحمد د هیواد ورزش خورا پرمختګ کړی، په دا وروستیو کې د فوټسال بریا، د تکواندو په برخه کې د طلا مډالونه او پرون د ۱۷ کلنو افغان فوټبال ملي لوبډلې د کافا جام سیالیو ګټل یې ښې بېلګې دي.
سمیر رحماني څه موده وړاند د چین هیواد په کوربتوب په سیالیو کې ګډون کړی و، چې دوه د طلا مډالونه یې وګټل. له دې وړاندې هم رحماني له بهرنیو لوبو ۷ د طلا، یو د نقرې او یو د برنزو مډال ګټلی و.
