افغان نابینا لوبغاړي ولي محمد نوري د ځغاستې سیالیو کې دوه د سرو زرو مډالونه وګټل
د افغانستان د ځغاستې او لامبو وهنې نابینا ملي لوبغاړي ولي محمد نوري په لندن کې د ځغاستې په دوه بېلابېلو سیالیو کې د سرو زرو مډالونه ګټلي دي.
د میټرو بلاینډ سپورټ په نوم دغه سیالۍ د انګلستان هېواد پلازمېنه لندن کې د نږدې سل تنو نابینا او نیمه بینا لوبغاړو ترمنځ ترسره شوې، چې پکې افغان نابینا لوبغاړي ولي محمد نوري د دوه سوو او اته سوو مترو واټن په طی کولو سره دوه د سرو زرو مډالونه ترلاسه کړل.
ولي محمد نوري تر دې مهاله د ځغاستې په ۲۲ نړۍوالو سیالیو کې ګډون کړی دی، چې پکې د سرو زرو مډالونو ګټلو ترڅنګ یې نورې لاسته راوړنې هم لرلي دي. همداراز ښاغلي نوري بیا د لامبو وهنې په درې نړۍوالو سیالیو کې هم ګډون کړی دی، چې پکې دوه د سرو زرو او یو د سپینو زرو مډال یې ګټلی دی.
