کابل د ۲۳۰ ورزشکارانو ترمنځ د کونګفو ملي فدراسیون سیالۍ ترسره شوې
د المپيک، بدني روزنې او ورزش لوی ریاست اړوند د کونګفو ملي فدراسیون له لوري د یاد ریاست په ۵۰۰ کسیز جمنازیوم کې د کابل ښار له ۵۵ ورزشي کلبونو د ۲۳۰ ورزشکارانو ترمنځ د لوی اختر د نمانځلو په موخه د کونګفو ملي فدراسیون دوستانه سیالۍ ترسره شوې.
دغه سیالۍ د تنکیو ځوانانو، نوي ځوانانو، ځوانانو او لویو ورزشکارانو په عمري کټګورۍ او د مایانا او باز مایانا سبک کې ترسره شوې او یو ورځ یې دوام وکړ.
دغو سیالیو ته د المپيک، بدني روزنې او ورزش لوی ریاست فني او مسلکي معاون حافظ احمدجان ځدارڼ، د یاد ریاست فني ریاست سرپرست حمیدالله صافی، د یاد ریاست ارشد مشاور ګلاب الدین خپلواک، کونګفو ملي فدراسیون رهبري پلاوي، ورزشکاران او زیات شمېر مینوال راغلي وو.
په دغو سیالیو کې د هېواد ورزش ادارې ارشد مشاور ګلاب الدین خپلواک د امنیت په فضا کې د ورزشي سیالیو په ترسراوي خوښي څرګنده کړه او زیاته یې کړه: زه شاهد یم، چې د اختر د نماځلو په موخه په ټول هېواد کې د هېواد ورزش ادارې له لوري بېلا بېلې ورزشي سیالۍ ترسره شوې او د هېواد ورزش اداره تل په دې هڅه کې ده، چې د ورزشکارانو د ظرفیت لوړولو لپاره داسې ورزشي سیالۍ برابرې کړي.
د یادو سیالیو موخه د نېکمرغه لوی اختر نمانځل او د کابل ښار منتخبو سیالیو ته د غوره لوبغاړو موندل و.
