غزني؛ اندړو ولسوالۍ کې د ۱۸ لوبډلو ترمنځ د والیبال سیالۍ پای ته ورسېدې
د غزني ولایت د بدني روزنې او ورزش امریت اړوند د والیبال فدراسیون د استازولۍ له لوري د یاد ولایت د اندړو ولسوالۍ په کلاخېل ورزشي لوبغالي کې د ۱۸ لوبډلو ترمنځ د والیبال سیالۍ د فروشګاه لوبډلې په اتلولۍ پای ته ورسېدې.
د دغو سیالیو په پایلوبه کې د فروشګاه لوبډلې خپلې سیالې شلګر زلمو لوبډلې ته د ۳/۰ میدانونو په توپير ماتې ورکړه او اتلولي يې خپله کړه.
د یادو سیالیو موخه ورزش ته د ځوانانو هڅوول او د نېکمرغه لوی اختر نمانځل و.
د سیالیو په پای کې غوره لوبډلې ته د اتلولۍ جام او غوره لوبغاړو ته کپ، مډالونه او ستاینلیکونه ورکړل شوه.
