ميدان وردگ؛ په چک ولسوالۍ کې د ۴۸ لوبډلو ترمنځ د ټېپ بال کرکټ سيالۍ پای ته ورسېدې
د میدان وردگ ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د چک ولسوالۍ په چک بند سيمه کې د ۴۸ لوبډلو ترمنځ د يووالي او لوی اختر لمانځلو په موخه د ټېپ بال کرکټ سيالۍ د ايکس ايلون لوبډلې په اتلولۍ پای ته ورسېدې.
د يادو سياليو پايلوبه د ايکس ايلون او هيرو زلميو لوبډلو ترمنځ ترسره شوه، ايکس ايلون لوبډلې د لوبې پچې په گټلو سره په ټاکلو اوو اورونو کې سيالې لوبډلې ته د ۱۳۰ منډو هدف کېښود، هيرو زلميو لوبډلې ياد هدف ترلاسه نه کړ او د ۳۰ منډو په توپير يې ماته ومنله.
دغه سیالۍ، چې اته ورځې يې دوام وکړ، په پای کې لومړي او دويم مقام گټونکو لوبډلو ته کپونه او غوره لوبغاړو ته ستاينليکونه او چمتو شوې ډالۍ ورکړل شوې.
