ننگرهار؛ په مومندرې ولسوالۍ کې د ۱۴ لوبډلو ترمنځ د فوټبال سيالۍ پای ته ورسېدې
د ننگرهار ولايت د بدني روزنې او ورزش رياست په همغږۍ د ياد ولايت په مومندرې ولسوالۍ کې د ۱۴ لوبډلو ترمنځ د ځوانانو يووالي او د ا.ا.ا له نظام څخه د ملاتړ په موخه د فوټبال سيالۍ د قيس لوبډلې په اتلولۍ پای ته ورسېدې.
د يادو سياليو په پايلوبه کې قيس لوبډلې سيالې لعلپورې کېنگ لوبډلې ته ۰/۳ گول په توپير ماتې ورکړه او اتلولي يې خپله کړه.
دغه سیالۍ چې شاوخوا يوه مياشت يې دوام وکړ، په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
