د لغمان ولایت د بدني روزنې او ورزش آمریت د ۱۴۰۲ لمریز کال کاري راپور
لغمان د هېواد په ختیځ کې پروت ولایت دی چې خلک یې له لوبو او تفریح سره ځانګړې مینه لري او تل یې په کورنیو ورزشونو کې فعاله ونډه اخیستې چې د پام وړ لاسته راوړنې یې لرلي دي.
د یاد ولایت د بدني روزنې او ورزش آمریت د بېلابېلو فدراسیونونو لوبغاړو په تېر ۱۴۰۲ لمریز کال کې هم په مختلفو ورزشي رشتو کې ګن شمېر سیالۍ ترسره کړي دي او په دغو سیالیو کې یې مهمې لاسته راوړنې لرلي دي.
د لغمان ولایت د بدني روزنې او ورزش آمریت اړوند د بېلابېلو فدراسیونونو استازولیو په تېر ۱۴۰۲ لمریز کال کې ۹۰ ورزشي سیالۍ ترسره کړي دي، چې له دې ډلې یې (۵۰) سیالۍ په مرکز او پاتې (۴۰) نورې سیالۍ یې په ولسوالیو کې ترسره شوې دي.
په دغه کال کې د شطرنج، ټېپ بال، ITF تکواندو، سامبو او فول رزم فدراسیونونو استازولیو نوی په فعالیت پیل کړی دی، چې په دې سره په اوس وخت کې په یاد ولایت کې ټولې د ۲۰ فدراسیونونو استازولي فعالې دی او په بېلابېلو برخو کې ۴۱ کلبونه رسماً فعالیت لري.
د یانې وړ ده، چې د یاد ولایت د ورزشي آمریت له لوري د عنعنوي لوبو او کونګفو فدراسیون غړو ته د ظرفیت لوړونې په برخه کې دوه سمینارونه هم وړاندې شوي دي.
د لغمان ولایت ورزشي آمریت د بیارغونې په برخه کې شپږ د والیبال او دوه د فوټبال میدانونه جوړ او فعال کړي دي.
همداراز په تېر یو کال کې د یاد ولایت د مختلفو برخو ورزشکارانو د هېواد به بېلابېلو ولایتونو کې په ۱۶ ولایتي سیالیو کې ګډون کړی دی چې لومړی، دویم او درېیم مقامونه یې ګټلي دي.
