خوست؛ عبيد اسیر لوبډلې د زرغون افغانستان په نوم د ټېپ بال کرکټ سياليو اتلولي وگټله
د خوست ولايت د بدني روزنې او ورزش امريت په همغږۍ د دې ولايت په تڼيو ولسوالۍ کې د ۴۶ لوبډلو ترمنځ د زرغون افغانستان په نوم د ټېپ بال کرکټ سيالۍ د عبید اسير لوبډلې په اتلولۍ پای ته ورسېدې.
د يادو سياليو پايلوبه د عبيد اسیر او سردار ولي افغان لوبډلو ترمنځ ترسره شوه، سردار ولي افغان لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۸۴ منډو هدف کېښود، عبيد اسیر لوبډلې ياد هدف په اتم اور کې ترلاسه کړ او د شپږو ويکټو په توپير يې بريا خپله کړه.
د يادونې وړ ده، چې په پای کې اتلې لوبډلې ته يو عراده موټر سايکل او غوره لوبغاړو ته چمتو شوې ډالۍ ورکړل شوې.
