د ۲۰۲۶ د فوټبال نړيوال جام او د ۲۰۲۷ کال د اسيا ملتونو جام د لارموندنې دويمې مرحلې سياليو کې د افغانستان او هند ترمنځ د فوټبال سيالي مساوي پای ته ورسېده
نن پنجشنبه د وري په دويمه د افغانستان د فوټبال ملي لوبډلې د ۲۰۲۶ نړيوال جام او د ۲۰۲۷ کال د اسيا ملتونو جام سياليو ته د لار موندنې دويمې مرحلې سیاليو کې د هند هيواد د فوټبال له ملي لوبډلې سره سيالي ترسره کړه.
دغه سيالي د عربستان هيواد په ابها ښار کې د کابل پر وخت د شپې ۱۱:۳۰ بجې ترسره شوه او له يوې په زړه پورې سيالۍ وروسته مساوي پای ته ورسېده.
د هيواد د فوټبال ملي لوبډلې روزنکي اشلي مايکل وستوود تېره ورځ په يوه خبري ناسته کې د دغې سيالۍ پر اړه ويلي و، چې افغان لوبډله له څو ورځو تمريناتو وروسته بشپړ چمتووالی لري.
دا د فوټبال د ۲۰۲۶ نړيوال جام د دويمې مرحلې او د ۲۰۲۷ کال د اسيا ملتونو جام سياليو لپاره د افغانستان د فوټبال ملي لوبډلې درېیمه سيالي وه.
افغان لوبډلې تر دې وړاندې خپلې دوه سيالۍ کويټ او قطر هيوادونو ته د ۴_۰ او ۸_۱ ګولونو په توپير بايللې وې.
