کونړ؛ اسعداباد ښار کې د ۳۴ لوبډلو ترمنځ د " سولې جام " په نوم د ټېپ بال کرکټ سيالۍ پای ته ورسېدې
د کونړ ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د اسعداباد ښار په کوزه شگۍ سيمه کې د ۳۴ لوبډلو ترمنځ د " سولې جام " په نوم د ټېپ بال کرکټ سيالۍ د هېواد لوبډلې په اتلولۍ پای ته ورسېدې.
د يادو سياليو پايلوبه د هېواد او جميل الرحمن لوبډلو ترمنځ ترسره شوه، چې په پايله کې جميل الرحمن لوبډلې په ټاکلو لسو اورونو کې د اوو ويکټو په سوځېدو سره خپلې سيالې لوبډلې ته ۱۵۸ منډو هدف کېښود، هېواد لوبډلې ياد هدف په نهم اور کې ترلاسه کړ او د نهو ويکټو په توپير يې بريا خپله کړه.
دغه سيالۍ، چې شاوخوا يوه مياشت يې دوام وکړ، په پاې کې گټونکې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
