کابل؛ د والیبال غوره لیګ درېیم پړاو گروپي سيالۍ پای ته ورسېدې
د بدني روزنې او ورزش عمومي ریاست اړوند د والیبال ملي فدراسیون له لوري د یاد ریاست په ۲۵۰۰ کسیز جمنازیوم کې د اتو لوبډلو په ګډون د والیبال غوره ليګ درېیم پړاو گروپي سيالۍ پای ته ورسېدې.
په ياد غوره لیگ کې ام البلاد، سپین غر، نښتر او پامیر په A گروپ کې او بالاحصار، بُست، هندوکش، نګیني هریوا په B گروپ کې شتون درلود، چې له گروپي سياليو څخه نيمه پايلوبې ته له A گروپ څخه ام البلاد او سپين غر او له B گروپ څخه بست او هندوکش لوبډلو لاره پیدا کړه او باقي بالاحصار، نښتر، نگيني هريوا او پامير لوبډلې له مخکې تگ څخه پاتې شوې.
د دغو سياليو پر اړه د واليبال ملي فدراسيون سکرتر جنرال محمد ناصر نوري وويل : " د پيل نه تر اوسه پورې غوره ليگ ډېر ښه روان دی هره ورځ درې سيالۍ تر سره کېدې، د ملي لوبغاړو تر څنګ ځوان لوبغاړي ډېر ښه لوبېږي، چې دا ښه خبره ده، د دغه غوره ليگ غوره لوبغاړي چې له ځانه يې وړتيا ښودلې په راتلونکې کې به د ملي لوبډلې برخه شي، که چېرې خصوصي سکټور او د بدني روزنې او سپورټ عمومي ریاست مالي همکاري لا زياتې شي؛ نو په راتلونکي کې به د لا ښه لوبو شاهدان و اوسو، نوموړي په خپلو خبرو کې زياته کړه، په پام کې لرو، چې په راتلونکې کال کې نوې لوبډلې هم اضافه کړو."
د يادونې وړ ده، چې د دغو سياليو لومړۍ نيمه پايلوبه به سبا ماسپښين ۲:۰۰ بجې د ام البلاد او هندوکش لوبډلو ترمنځ ترسره شي
