لغمان؛ مرکز مهترلام کې د ۳۸ لوبډلو تر منځ د ټېب بال کرکټ سيالۍ پېل شوې
د لغمان ولايت د بدني روزنې او سپورټ آمريت اړوند، د ټېب بال کرکټ فدراسيون د استازولۍ لۀ لورې، د ياد ولايت په مرکز حيدر خان بابا کلي کې د ۳۸ لوبډلو تر منځ د ټېب بال کرکټ سيالۍ پېل شوې.
د يادو سياليو لومړۍ لوبه د اتحاد ځوانانو او حيدر خان بابا ځوانانو لوبډلو تر منځ ترسره شوه، د لوبې پچه اتحاد ځوانانو لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د ۷ لوبغاړو په سوځېدو سره سیالې لوبډلې ته د ۷۴ منډو هدف کېښود، حيدر خان بابا ځوانانو لوبډله د ياد هدف په پوره کېدو کې پاتې راغله او د ۲۶ منډو په توپير اتحاد ځوانانو لوبډلې په بريا پای ته ورسېده.
دغه سيالۍ، چې ۲۱ ورځې به دوام وکړي، موخه يې لۀ نظام څخه ملاتړ او د نشه يې توکو پر وړاندې مبارزه ياده شوې ده.
