فاریاب کې د بېلابېلو موضوعاتو په اړه ښوونیز سمینار ترسره شو
په فاریاب ولایت کې د هېواد د بدني روزنې او ورزش ریاست د پلاوي له لوري د یاد ولایت د ورزشي آمر په شتون کې په ورزشي لوبو کې د پلان جوړونې، ورزشي بازار موندنې، په اسلام کې د ورزش اصولو او مقرراتو، د لومړنیو مرستو او ورزش زیان پېژندنې په برخو کې یو ورځنی سمینار وړاندې شو.
په دغه سمینار کې د فدراسیونونو مسؤولانو، د مختلفو برخو روزونکو او مډال ګټونکو برخه اخیستې وه.
د یاد سمینار موخه په بېلابېلو برخو کې د پوهاوي د کچې لوړول ښودل شوي دي، چې په پای کې د بدني روزنې او ورزش ریاست له لوري د سمینار ګډونوالو ته ستاینلیکونه ورکړل شول.
