ننګرهار؛ شگۍ لوبډلې د ټېب بال کرکټ سیاليو اتلولي وگټله
د ننګرهار ولايت د بدني روزنې او سپورټ رياست اړوند، د شينوارو شپږگونو ولسواليو سپورټي مدیریت له لوري، د ياد ولايت په دور بابا ولسوالۍ کې د ۱۶ لوبډلو تر منځ د سولې جام په نوم، د ټېب بال کرکټ سيالۍ د شگۍ لوبډلې په اتلولۍ پای ته ورسېدې.
د يادو سياليو پايلوبه د شگۍ او چینار لوبډلو تر منځ تر سره شوه، د لوبې پچه شگۍ لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې یې د شپږو لوبغاړو په سوځېدو سره سیالې لوبډلې ته د ۱۲۳ منډو هدف وټاکو، چينار لوبډله د ياد هدف په پوره کېدو کې پاتې راغله او د ۱۷ منډو په توپير شگۍ لوبډلې د ياد جام اتلولي په خپل نوم کړه.
د يادونې وړ ده، چې د دغو سياليو موخه، له نظام څخه ملاتړ او د ځوانانو تر منځ يووالی ښودل شوی و.
په پای کې لومړي مقام او دويم مقام گټونکو لوبډلو ته کپونه ورکړل شول.
