ننګرهار؛ شينوارو ولسوالۍ کې مهاجرو افغانانو ته د هرکلي په موخه د پهلوانۍ نندارې وړاندې شوې
د ننګرهار ولايت د بدني روزنې او ورزش رياست اړوند د شينوارو ولسواليو د ورزشي مديريت پۀ لارښونه او همغږۍ په یاده ولسوالۍ کې له پاکستانه د افغان مهاجرو لپاره د هر کلي په موخه د پهلوانۍ هېښوونکي او جالبې نندارې وړاندې شوې.
د پهلوانۍ دغه نندارې، چې د موټر مخه ډب کول، د سر په وېښتانو د موټر کشول، د سینې او خېټې له پاسه د تېږو ماتول او ځينې نورې حیرانونکې نندارې پکې شاملې وې، د هېواد د مشهورو پهلوانانو شاه محمد لوګري او خان محمد افغانيار له لوري د شينوارو پۀ لويه ولسوالۍ کې د پهلوانۍ مینوالو ته وړاندې شوې.
دا نندارې د شينوارو ولسواليو ورزشي مدیریت پۀ لارښوونه او همغږۍ له پاکستان څخه د راویستل شویو کډوالو د ښه راغلاست او د نظام د ملاتړ په موخه چمتو شوي وې
. د پهلوانې په دې نمایشونو کې د شینوارو ولسوالۍ ولسوال، امنیه قومندان، د شینوارو د ولسوالیو ورزش مشر، ګڼو ملکي او نظامي مسوولانو، قومي مخورو، ځوانانو او د پهلوانۍ مینه والو برخه اخیستې وه.
د یادونې وړ ده، چې څو ورځې وړاندې د شاه محمود لوګري له خوا په سره رود ولسوالۍ کې هم د پهلوانۍ بېلابېل نمایشونه نندارې ته وړاندې شوي وو.
