لوګر؛ په مرکز پل عالم ښار کې د بدن ښکلا او پاورلفټنګ ورزشکارانو نمايشونه ترسره شول
د لوګر ولایت بدني روزنې او ورزش امريت په مرسته د بدن ښکلا او پاورلفټنګ فدراسيونونو له لوري په مرکز پل عالم ښار ورزشي نندارې ترسره شوې.
په دغو نندارو کې د پاورلفټنګ فدراسیون په تنکيو ځوانانو، ځوانانو او لويانو سني کټګوريو کې ٣٠ تنو ورزشکارانو ګډون درلود، چې په ١٤٠، ١٩٠ او ٢١٠ کيلو وزن پورته کولو کې نمايشونه ترسره کړل.
همداراز د بدن ښکلا ورزشکارانو هم جالب او په زړه پوري نمايشونه وړاندې کړل.
د دې نندارو موخه په لوګر کې ورزش ته د ځوانانو هڅول او د يادو ورزشي رشتو وده ده.
په پاى کې د لوګر د ورزش امريت له لوري د ورزشکارانو د تشویق په موخه مډالونه، ستاینلیکونه او ورزشي بيکونه ورکړل شول.
