په کندهار کې د جنوبي زون په کچه د غېږنیونې سیالۍ پیل شوې
د کندهار ولایت په مرکز کې د جنوبي زون په کچه د هلمند، کندهار، زابل او ارزګان ولایتونو د لسګونو تنو پهلوانانو ترمنځ د غېږ نیونې سیالۍ پیل شوې.
د سیالیو د پیل په مراسمو کې د کندهار ځایي دولتي مسۇولینو، ورزشکارانو او له کندهار ښار او ولسوالیو څخه زرګونو نندارچیانو برخه اخیستې وه.
په سیالیو کې د سوېلي زون د څلورو ولایتونو ترڅنګ د چمن او کویټې پهلوانان هم شتون لري.
دغه سیالۍ چې نن مازدیګر په غازي محمد ایوب خان لوبغالي کې پیل شوې، برخه وال پهلونان به یې په دوو ګروپونو(احمدشاه بابا ابدالي او میرویس خان) کې دوه ورځې په ګډه سیالۍ وکړي.
د سیالیو موخه د ولایتونو د پهلوانانو ترمنځ یووالی رامنځ ته کول او د ولسونو لپاره د تفریح برابرول دي.
ټاکل شوې ددې سیالیو پایلوبه به سبا مازدیګر ترسره شي.
