د هیواد د فوټبال ملي لوبډلې لومړنۍ تمریناتي غونډه ترسره شوه
د ریاض په یوه کمپ کې د هېواد د فوټبال ملي لوبډلې لومړنۍ تمریناتي غونډه ترسره شوه.
په دغه روزنیز کمپ کې د عبدالله المطیري له لوري له رابلل شويو لوبغاړو سره تمرینات ترسره شول، ترڅو د تمرين د ځای له اقلیم او هوا سره لوبغاړي بلد شي او هغه لوبغاړي چې د اروپا په فوټبال کې لوبيږي له داخلي لوبغاړو سره د ګډې لوبې شناخت او نږدېوالی پيدا کړي.
دغه تمريناتي غونډه نن پنجشنبه د غبرګولي مياشتې له ۱۱مې نېټې څخه پیل او د تمرين د مهالوېش له مخې ملي لوبغاړو نن سهار په جېم کې فزيکي تمرين ترسره کړ، همداراز به نن ماښام دویمه تمریناتي ناسته هم ترسره کړي.
د يادونې وړ ده، چې د هېواد د فوټبال ملي لوبډلې مخکې له دې چې قرغيزستان ته سفر وکړي او د منځنۍ اسيا/کافا په سياليو کې ګډون وکړي؛ د سعودي عربستان په پلازمېنه ریاض کې يې د یوې اوونۍ لپاره روزنیز کمپ پیل کړی دی.
