د فوټبال ملي لوبډلې نوی کویټي روزونکی عبدالله المطیري افغانستان ته راورسېد
عبدالله المطیري د افغانستان د فوټبال ملي لوبډلې نوی روزونکی نن افغانستان ته راورسېد. ښاغلي عبدالله المطیري ته د فوټبال فدراسیون معاون حافظ احمدجان او ورسره ملو ورزشکارانو ښه راغلاست او هرکلی وکړ.
تمعه ده، چې څو ورځې وروسته به له ښاغلي المطیري سره د رسمي قرارداد د لاسلیک کولو مراسم ترسره شي.
ښاغلی المطیري د کويټ هیواد اوسېدونکی دی، د فوټبال په برخه کې یې د روزونکي په توګه دنده له ۲۰۱۷ م کال څخه پیل کړې. په یاده برخه کې یې د ځینو مهمو لوبډلو روزنه ترسره کړې، چې په ۲۰۱۹ م کال کې یې د قطر له ۲۳ کلنو کم عمره الشحانیه لوبډله، په ۲۰۲۰ م کال کې یې د قرغیزستان د ۱۷ کلنو لوبډله او له ۲۰۲۱ څخه تر ۲۰۲۲ م کال پورې یې د نیپال د ملي لوبډلې د مربي په حیث دنده ترسره کړې ده.
عبدالله المطیري په داسې حال کې د افغانستان د فوټبال ملي لوبډلې روزونکی ټاکل کیږي، چې په نږدې راتلونکې کې د ملي لوبډلې د ورزشکارانو لپاره په پلازمېنه کابل کې تمریناتي کمپ په پام کې نیول شوی، چې له هیواد څخه بهر ورزشکاران به هم پکې ګډون وکړي.
