کندهار؛ د غازي محمد ایوب خان ورزشي لوبغالي د بیارغونې چارې جریان لري
په کندهار کې د غازي محمد ایوب خان لوبغالی چې ډېر خلک يې په باغ عمومي پېژني د بیارغونې چارې یې روانې دي، چې ژر به د لوبغاړو پرمخ پرانیستل شي.
د دغه لوبغالي لېول کاري او د چمن کرلو چارې څه موده وړاندې د کندهار د بدني روزنې او ورزش ریاست له لوري پیل شوې چې لا هم دوام لري.
د کندهار د بدني روزنې او ورزش رئیس حافظ محمود آغا بشر وايي: د یاد لوبغالي په بیارغونه کې د کندهار ښاروالۍ هم مرسته کړې چې دوی ترې منندوی دي.
د ښاغلي اغا بشر په وینا: د یاد لوبغالي د بیارغونې چارو له بشپړیدو سره سم به په همدې لوبغالي کې یوه لویه ورزشي مېله جوړه کړي، چې د کندهار ښار او ولسوالیو ترڅنګ به د بېلابېلو ولایتونو مېلمانه او خلک هم پکې ګډون وکړي.
نوموړی زیاتوي چې د کندهار د بدني روزنې او ورزش ریاست مشرتابه هڅه کوي ترڅو د ورزش د لا پراختیا په موخه هیوادوالو ته د ورزش امکانات نور هم ډېر کړي.
د یادونې وړ ده چې د دې لوبغالي د بیارغونې چارې په شخصي لګښت ترسره کیږي چې د کندهار د بدني روزنې او ورزش رئیس حافظ محمود آغا بشر له خوا ورکول کيږي
