میدان وردک؛ له لوبغاړو څخه د ا.ا.ا د ملاتړ تر عنوان لاندې د والیبال سیالۍ پیل شوې
د والیبال دغه سیالۍ د پنجشنبې په ورځ د میدان وردګ ولایت په مرکز میدان ښار کې په ځانګړو مراسمو سره پیل شوې د یادو سیالیو د پیل پرمهال د بدني روزنې او ورزش امر ذبیح الله وهاج وویل: د مرکز په شمول په ټولو ولسوالیو کې د والیبال سیالۍ په رسمي توګه او د ټاکل شویو کمېټو لخوا پپل کیږي، هغه زیاته کړه: له دغه سیالیو مو موخه د ځوانانو ترمنځ یووالی او د ولایت په کچه د والیبال د یوه پیاوړي ټیم جوړول دي ترڅو د زون په کچه یو ټیم جوړ او د والیبال په لوبو کې ولوبیږي.
د دغه لوبو د پیل پر مهال د ولایت مقام استازي مفتي احمدالله نظامي، د اطلاعاتو او فرهنګ رییس مولوي صفیع الله رائد دا ډول سیالۍ د ځوانانو ترمنځ د یووالي او سالم رقابت لپاره ښه اقدام وباله او د ورزش له امریت څخه مننه وکړه چې دا ډول سیالۍ یې برابرې کړي دغه راز دوی لوبغاړو او د ورزش امریت مسؤلینو ته د هر ډول همکارۍ او ملاتړ ډاډ ورکړ.
د یادونې وړ ده پهلوان شا محمد لوګري او د هغه زوی تاج محمد لوګري ته د ولایت مقام لوری نغدي ډالۍ هم ورکړل شوې، پهلوان شامحمد لوګری تر دې وړاندې د طالبانو د پخواني تحریک په دوره کې دغه ولایت ته راغلی ؤ او په بېلابېلو ولسوالیو کې یې د پهلوانۍ نمایشونه نندارې ته وړاندې کړي و.
