کابل؛ د ورزش ادارې رهبري د ای ټي اف تکواندو نړيوالو استادانو رانا صداقت علي او ماسټر هونګ يونګ دو سره وليدل
د هېواد د ورزش ادارې عمومي رئيس مولوي احمد الله وثيق او د يادې ادارې فني او مسلکي مرستیال حافظ احمد جان ځدراڼ، د ای ټي ایف تکواندو له دوو بهرنیو استادانو پاکستاني رانا صداقت علي او کوريايي ماسټر هونګ يونګ دو سره، ولیدل او خبرې اترې يې ورسره وکړې، کوم چې د ای ټي اف تکواندو نړيوال او تخنيکي سيمينار د استادۍ په موخه افغانستان ته راغلي وو.
په دغه ليدنه کې مولوي احمد الله وثيق له راغلو استاذانو ماسټر هونګ يونګ دو او رانا صداقت علي څخه د مننې ترڅنګ د ای ټي اف په برخه کې ورزشکارانو ته د هغوی د غوره لارښوونو او فني پوهې د لېږدولو په همکاريو خوښي څرګنده کړه او د دوی راتګ يې افغانستان ته يو ښه اقدام وباله.
همدارنګه ماسټر هونګ يونګ دو او رانا صداقت علي د افغانستان د خلکو د ميلمه پالنې او د ورزشي بنسټونو ستاينه وکړه او د اسلامي امارت د مسوولينو له همکاريو مننه وکړه.
د يادونې وړ ده، چې ماسټر هونګ يونګ دو د ای ټي اف تکواندو نړيوال مدرس په توګه افغان ورزشکارانو ته د تخصصي مفاهيمو د زده کړې او د تخنيکي پوهې د ظرفيت لوړولو په موخه يو تخنيکي سيمينار درې ورځې مخکې ترسره کړ، چې نن رسمي پای ته ورسېده.
